Om Hjerkinn skytefelt
Det 165 km² store Hjerkinn skytefelt har vore det største skytefeltet Forsvaret har hatt i Sør-Noreg, inntil Regionfelt Østlandet blei opna i 2005. Feltet blei etablert i 1923 og har etter krigen vore brukt til skarpskyting for Artilleriet, Kavaleriet og Luftforsvaret, i tillegg har det vore brukt av avdelingar frå allierte nasjonar. Skytefeltet skal no tilbake til naturen.

Skriv miljøhistorie
Mellom militære anlegg som no skal fjernast, er ei prøve- og forsøksslette for Artilleriet og Luftforsvaret på 240 dekar, to store angrepsfelt for Kavaleriet og fleire titals kilometer med veg. Områda, som ligg 1100–1200 moh., skal restaurerast og leggjast til rette for revegetering. I tillegg skal heile skytefeltarealet ryddast for eksplosiv- og ammunisjonsrestar, metallskrap og avfall.
Manngard med vernepliktige soldatar, støtta av eksplosivekspertar og GPS-teknologi, har per juli 09 søkt gjennom cirka 94 km². Og arbeidet held fram: Ryddinga med manngard vil etter planen halde fram kvar sommar fram til og med 2020. I den samanhengen følgjer Forsvarsbygg teknologiutviklinga innan eksplosivrydding nøye, ettersom det er viktig å gjennomføre ryddinga med den til ei kvar tid best tilgjengelege metoden.

Alt skal vekk
Som ein del av tilbakeføringa skal vegar, bygg, målområde, standplassar, målbaner og andre sår etter øvingsverksemda til Forsvaret gjennom over åtti år fjernast. I august 09 starta arbeidet med å fjerne dei mest sentrale anlegga. Av omsyn til tryggleiken under anleggsarbeidet vil mykje av anleggsarbeidet bli gjort med fjernstyrte gravemaskiner, dumparar og andre anleggsmaskiner.

Nærmare 20 forskarar frå dei fremste fagmiljøa følgjer med
Prosjektet er per definisjon eit miljøprosjekt. Ein legg derfor store ressursar i eit miljøoppfølgingsprogram som sikrar miljøvern i verdifull og sårbar fjellnatur. I tillegg er det viktig for Forsvarsbygg å dokumentere dei positive miljøeffektane som er knytte til at skytefeltet no er lagt ned og blir tilbakeført til naturen. Ei rekkje kartleggings- og overvakingsprogram i regi av dei fremste fagmiljø i Noreg er derfor ein viktig del av prosjektet. Dei vil kartleggje både situasjonen vi har i dag, og korleis utviklinga blir i åra som kjem.

Korte fakta om prosjektet

Totalprosjekt med tre delprosjekt:

• Delprosjekt plan, miljø og sivil avtale
• Delprosjekt eigedom, bygg og anlegg (EBA)
• Delprosjekt eksplosivrydding og drift

Framdrift

Fase 1:
2006 til 2012: Fjerning av tunge anlegg og éin full runde med eksplosivrydding på heile skytefeltarealet (søk i tre retningar).

Fase 2: (blir vurdert etter 2012)
2013–2020: Inntil to fulle rundar med eksplosivrydding, avhengig av akseptabelt nivå for rest-risiko. Resterande anlegg.

Kostnadsramma for Fase 1, frå 2006 til 2012, er 321 millionar kroner. Omfang og kostnader i Fase 2, frå 2013 til 2020, kjem an på avklaringar gjennom Fase 1 og vil bli fremja for Stortinget på eit seinare tidspunkt.

Kontakt

Prosjektleiar
Forsvarsbygg Utvikling Øst
Odd-Erik Martinsen
Telefon: 930 67 846