Støykartlegging
Støykartlegging
Støyrådgivarane våre har den fremste kompetansen i landet på støy frå militær aktivitet.
Kva er støy, og kvifor kartlegg vi den?
Støy er uønskt eller forstyrrande lyd og blir rekna som forureining etter forureiningsloven.
Støy gjer det vanskeleg å oppfatte ønskte lydar, som tale eller varslingssignal, og kan ved langvarig eksponering auke risikoen for hjarte- og karsjukdommar. Mykje av støyen vi blir utsette for kjem frå nødvendig verksemd som transport, byggearbeid – og militær øving.
Slik fungerer støykartlegginga
Forsvarsbygg følgjer den statlege retningslinja T-1442 om støy i arealplanlegging. I tillegg tar vi omsyn til støy frå tunge våpen og sprengingar.
Vi bereknar eller måler støyen i det aktuelle området. Deretter lagar vi støysonekart for å vise graden og utbreiinga av støyen. Karta viser to soner:
Raud støysone: Svært støyutsett. Her bør det ikkje etablerast nye bygg for bustad, skole eller helseformål.
Gul støysone: Moderat støy. Her kan det byggast dersom bygningane får støyreduserande tiltak.
Støybelastning blir synleggjord med støysonekart
Vi utarbeider støysonekart for alle Forsvarets skyte- og øvingsfelt, basert på nåverande og planlagd framtidig aktivitet.
Karta synleggjer støybelastninga i området og er viktige verktøy for kommunar og planmyndigheiter i arelplansaker.
Støysonekart er med å vareta sivile og militære behov
Målet med støykartleggingane er å førebygge støyplager for naboar og lokalsamfunn, utan å avgrense Forsvarets øvingsmoglegheiter og operative evne.
Ved å kartlegge og formidle støysoner, bidrar vi til at Forsvaret kan gjennomføre nødvendig trening, samtidig som vi tar omsyn til helse og trivsel i lokalsamfunna rundt. Det gir betre samspel mellom Forsvaret, kommunane og innbyggarane.
Støy frå forsvarsaktivitet skil seg frå annan støy
Utfordringane med støy frå forsvarsverksemd er annleis enn det ein møter i kartlegging av andre støykjelder, som for eksempel veg- og jernbanetrafikk.
Støyen kan forplante seg over lange avstandar, noko som gjer at mellom anna meteorologi, terreng og bakkeforhold får ekstra mykje å seie.
Vi forskar på støy frå militær aktivitet
Den spesielle karakteren til støykjeldene fører til at vi sjølv må ta ansvar for å utvikle og forbetre berekningsverktøya våre.
Forsvarsbygg har eigne forskingsprosjekt knytta til støy frå militær aktivitet. Vi samarbeider også med Forsvarets forskningsinstitutt, Noregs geotekniske institutt og SINTEF.